(كفاك دموع يا قلبي تـرى دمعـك علـي غالـي)
انا مالـي بهالدنيـا أحـد غيـرك يواسينـي
دخيلك حتى لو صاحت جروحك ترفـق بحالـي
أخاف صياحها تحيـي جـروحٍ ميتـة فينـي
صعبة و الله هالدنيا علـى مثلـك وأمثالـي
صغارٍ عالحزن لكن أبـت تستوعـب سنينـي
سقتني المر في عمرٍ شرب به غيـري الحالـي
و كل ما صحت: يا دنيا ذبحني المر, تسقيني!!!
وحيد عشت أنادي الفرح لجروحي و لا جالـي
رحلت بكل صوب و ما لقيـت اللـي يداوينـي
و تراها ما غدت تفرق معي لو طـال ترحالـي
(أنا أصلا سكنت الجرح و ضاعت به عناويني)
عشقت الحزن مو برضاي و عيا الوقت يصفالي
و يوم انه رجف دمعي ذبحته في وسط عينـي
لك الله وش يفيد الدمع و لو هو سيل متوالـي
لك الله امسح دموعك تـرى هالدمـع يشقينـي
مصير جروحنا تذبل قصـر هالعمـر اوطالـي
و اذا جرحك ابـى يبـرى بضمّـده بشرايينـي
